wosma sainer dochder sång mou

(Satire)

schee bläid sänns in der liibe

di waiber, normålerwais

an iern ärschdn hengers droo

biss nämmer ged

und wenns doch ged, und ghairad werd

dauerds awàll, bis iiner aifelld

si kenndn wos versaimdhom

bain bussiern

ower wou nämmerdmer suns di waiwer häer

däi wou mer braung?

die kaddrin is dou anderschd gween

ned dass aff iern alldn an hass gschuum hed

suns hedsasi nedasu aausnidsn lassn

zwaa kinder

die ärwerd dahàmm

unnocher heds nuuin gansn dåch

firs gscheffd dåsai solln

då dauerds ned lang

sixd alld aus

ower di kaddrin

wår nua saubers maadla

wäis neemnausis

an derng homs ghabd in der undermiidn

a oardlicher kerl, mid sain drollichn daitsch

mid denns efders gredt hod

als a fraindliche haausfraa

däis woar

undis ned lang ganga

nou wårs mid iern leem

går nämmer suu zfriidn

der håderer aigredt

si raiberdsi aaf

(und mid dem vergniing vo dära eje

werds aa ned waid härgween sai)

andere

wern bai suwos dann bambich

wern drachng

schmaisn ier wår ausn eff eff

und sunsd koosd iiner gschdulln blaim

ower di kaddrin

des louder

däi bixn

deär vregger

däi wår asu bläid

und asu hubferd

und is fremdganger mid iern hakki

wäis der moo gschbannd hod

nadierlich is nou lousganger

en derng hod er nausgschmissn

di fraa hod iere fozn gräichd

wäi sis gherd

und dåmid hed a rou sai kenna

ower di kaddrin

hodsi gsachtd: edzat gråd!

däi hod im ernsd gmaand

wenns zo iern hakki zäichd

hodses schänner

ja schaisn!

wäis blous ner iin ghabd hod —

wall iere aingna leud

hods ja vuurn kuubf schdoosn mäin —

hoders gschlång

droschn hoders

wenns ned barrierd hod

zon dogder hods mäin

weecha wos glann

dasserers wechmachd

zwaamål

wår des a leem?

su a bläids waibsbilld

dou sixders edzamål

maadla

dass bai denne schlamberdn verhälldnisse

nix gschaids rauskummd

undannu middan fremdarwaider!

aff di lezd schdelld si raus

dass der derg dahàmm

scho middrer andern

verhairad wår

däi banggerdn gräing ja ned gnouch

blous mid aaner

däi mohamedaaner

noch daitschland hoders hulln wolln

eer, di dreegsau

ier, der kaddrin

hoder no scheedou

sii soll di "herrin saain"

undi ander di "sklavin"

a andre wär zo iern alldn zruck

odder

wasses wårschainlichere is

wär a schnalln worn

ower di kaddrin hodsi

a glainkalibergweer kaffd

a bloudicher dooder moo

is ka scheener oobligg

iiberhabbds a derg

a naggerder

durchng kuubf isnan di kuugl

und däif in di madrazn nai

im schlåf hodsnern derschossn

a andre hedsi dann

wenichsdns selber umbrachd

ower di kaddrin

is zer bolizai grennd

und hodsi oozaichd

gråd flenna douds vuur gerichd

und dauernd hods grämf

und dedanus-schbrizn gräichds

ma maanerd gråd si vreggerd

wenner des ier verdaidicher

gsachd hod, dass di schaau abziichd

nocher machdses erschdrechd fallsch

wall suwos nämmer normål is

haid schded inder zaidung

dasses ins zuchdhaus hamm

maadla, nimmdera baischbill

an dainer mouder

dem ooschdending fraala

edz sixd wohii ma kumma koo

wemmer zu sinnlich is

und bläid derzou.